کیم گوروب اوخلانسون آلتایلوق بالا نوک تیر اولسون اونا پستان اوغول
نه منم یالقیز یانان احوالیوه یانده دشمنلر آلشدی حالیوه
حرمله گوندردی استقبالیوه زهرلی اوچ شعبه بیر پیکان اوغول
تا سنی ویردی نشان شه دشمنه من ایشیتدیم گلدی دشمن شیونه
چوخ امید ایتدیم ویرللر سو ینه حیف امیدیم اولدی بیر حرمان اوغول
حرمله باخدی گل نورسته سن حس سیز بلبل کیمی دل خسته سن
اوخلینده گوردی سن جان اوسته سن نه بهانه ایلدی عنوان اوغول
قلبیمی آهیله بیجا اویمارام ناله دن بلبل کیمی من دویمارام
قانلو قونداقون یر اوسته قویمارام خوشدی سینمده اولا مهمان اوغول
قویدی هر کس خوان بزم یاره گل همتیجه یولادی دلداره گل
ام لیلا ویردی بیر صد پاره گل منده ویردیم غنچه ای خندان اوغول
گون ایوینده سن سوسوزجان ویرموسن شاهد اول بو عهد و پیمانیمده سن
قسمت اولسا المه سم گورسم وطن گون ایوینده اگلشم سوزان اوغول
نسگلون دلدن فراموش ایتمرم آتشین اولسمده خاموش ایتمرم
هیچ سرین سو جرعه ای نوش ایتمرم تا اولم عهدیم تاپا پایان اوغول
آلتی آی هر نصف شبلرده نجه سود ویروب وقتونده قویمازدوم گجه
سود امن وقتون آیلسام بو گجه نیلیوم من خانمان ویران اوغول
غفلت اولسیدی آج اولسیدون اگر سینه مین سود موجی ایلردی خبر
من سنه نامهربان اولدوم مگر آج سوسوز ویردون آناسیز جان اوغول
ایل بولر فوت اولسا گر بیر سود امر کیم بولر بیچاره مادردن خبر
آخشام اولجاق سینه سین بیر سود گزر سود دیمه بیر آتش سوزان اوغول
خون ناحقون سپیلدی گویلره قانلو خط ووردی سپهر اخضره
انتقامون قالدی روز محشره وای اگر عدل ایلسه دیوان اوغول
دیدیروب اوخ دایه سی سن گولموسن گولماقون قان آغلادیرمیش بولموسن
وای آنان اولسون علی سن اولموسن ویرموسن جان دوشموسن بیجان اوغول
نسگلون اودلی اوکلر داغلادی چاره من بیچاریه یول باغلادی
غنچه وش گولدون یاران قان آغلادی غنچه گولسه گوسترور القان اوغول
کوسموسن مندن دیمیشدیم آغلاما وورما دیرناخ سینمی چوخ داغلاما
گل گذشت ایت پوزشه یول باغلاما آغلاما آغلار گوزه قربان اوغول
اوخ دگنده قوخموسان دیسگین میسن دوشموسن ضعف عالمینده اینموسن
هر دیلیله دیندیرنده دین مینموسن بس نیدیم من خانمان ویران اوغول
بسکه گوزدن گوز یاشی توکدوم سنه سیل تک موج ایتدی داشدی دامنه
دوندی دریایه یقین اولدی منه تیز قوپاردار قانلو بیر طوفان اوغول
تیز او طوفان قوپدی تاخیر اولمادی هیچ کیمی گردابه من تک سالمادی
سن کیمی روحیمده الده قالمادی ایلدی مستغرق طغیان اوغول
ساخلارام بو انتقمی محشره ایلرم شکوه خدای داوره
سینمی ویرم نشان پیغمبره ایلرم دل دردیمی اعلان اوغول
بوش دوشه سالدیم سنی من آغلادیم سن خراش ایتدوقجا سینه داغلادیم
لاعلاج اولدوم الیوی باغلادیم بولمدیم جبرا آچار دوران اوغول
گل ویراخ رصت گوز اشگ آلینه آغلاشاق قان بیربیرین احوالینه
آغلاسن بو اوغلی اولموش حالینه آغلیوم مند سنه هر آن اوغول
حقلیم باشی آچوخ قاچسام چوله ناله دن ناله یولون آچسام چوله
دسته دسته ساچ یولوب ساچسام چوله آغلیام چوللرده سرگردان اوغول
من دیردیم آغلاما بیر یات اوغول خون دل گوز یاشیمه آز قات اوغول
نه منی بیله گوزوندن آت اوغول گوزلرون قربانی بو گریان اوغول
شعر: استاد ذهنی زاده
ورود آل الله به شام