ائتدی فرمایش خدای ذوالکرام و ذی شرف
ای ملائکلر بو قدری ائتمیون آه و اسف
آدمی خلق ائتماقیمدا واردی بیر عالی هدف
ساخلادی یوم بلایه انتشارین یا حسین
امر قیلدی گر ملائک سجده ائتسون آدمه
علتی سنسن اولان ای فخر جدون خاتمه
گزدون اصلاب مطهرده گلینجه عالمه
عالمه تا ظاهر اولدی گلعذارین یا حسین
جدیوه اعطا ائدوب خالق رسالت منصبین
حیدر کراره لطف ائتدی ولایت منصبین
اخذ ائدوبسن سنده مصباح الهدایت منصبین
اهل اسلامه یئتیبدور انتصارین یا حسین
قیمتین دینین بولوب اسلامه اولدون جان نثار
قانویله گلشن دینی ائدوبسن آبیار
یار و انصارین اولوب پیر و جوان و شیر خوار
جمله باش و جانیله اولدی نثارین یا حسین
باغلامیشدین یاریله بیر عهد سن یوم الست
سن او گوندن باده عشقیله اولدون مست مست
رهروان عشقیوی ائتدون سرا پا می پرست
جام عشقوندن ایچن اولدی خمارین یا حسین
آزقالور احساس قیلدون دین حق گورسون خطر
کعبه دن کرب و بلایه باغلادون بار سفر
باشیوه جمع اولدی یئتمیش بیر نفر فرزانه فر
آلدیلار پروانه تک شمعین کنارین یا حسین
مرحبا ای جان حیدر نور عین فاطمه
باش و جاندان گئچدون اما اگمدون باش ظالمه
تا قدم قویدون بلا صحراسینه بی واهمه
دوتدی دورون دشمن بی ننگ و عارین یا حسین
دین اسلامه سنون تک اولمادی بیر کس رئوف
آفتاب دینی گوردون آزقالور ائتسون کسوف
سن اوزون اولدون رضا تاپسین سنی عریان سیوف
اولدی هیهات من الذله شعارین یا حسین
سن جهاد فی سبیل اللهی آغاز ائیلدون
شاهراه عشقی عشقین اهلینه باز ائیلدون
سن فراته تا لب عطشاتیله ناز ائیلدون
عالمینین نازیله آلدین قرارین یا حسین
گئچدی ایللر تا یئتیشدی عاشر شهر الحرام
دین حق اوسته علیه کفره ائتدون بیر قیام
هم مرامون اولدی یئتمیش بیر نفر عالی مرام
ظلمت ائتدون اهل کفرون روزگارین یا حسین
صبح عاشورا گون اولدی مطلعیندن جلوه گر
پیش روده جان بکف عاشقلرون صف چکدیلر
دوره وی محصور قیلدی اشقیای خیره سر
دشمنون پوزدون ولی محکم حصارین یا حسین
باوفا انصاریوین گورمز نظیرین روزگار
جسمدن هر تک تکی رخت علایق سویدولار
مکتب آزادگی دشت بلاده قوردولار
عالمه نشر اولدی حریت شعارین یا حسین
بی بدلدور دهریده اعوان و انصارین سنون
اولدولار هر تک تکی دلدار و غمخوارین سنون
عالمی ایلئبدی حیران سود امر یارین سنون
عالم اولسون جان نثار شیر خوارین یا حسین
بیر غلامون وار سیه چهره ولی روشن ضمیر
وار یئری عالم کمند عشقینه اولسون اسیر
اولدی دانشگاه عشقونده برازنده دبیر
کسب ائدیبدور عالمینین افتخارین یا حسین
مرحبا بیر ائیله نوکرده علو همته
اونداکی گوردی واروندی احتیاجون نصرته
اللری قوینوندا گوز یاشلی گلیبدور خدمته
سن او ساعت عشقینین بولدون عیارین یا حسین
عرض ائدوب ای اسم پاکی بذل ائدن عزت منه
درگهونده خدمتیمدور وئردی حیثیت منه
ائیلدون بیر عمر احسان ائتمدون منت منه
اولموشام مشمول لطف بیشمارین یا حسین
گرچه بی ارزشدی بوللم یا حسین قانیم منیم
فخر قیللام گر سنه قربان اولا جانیم منیم
عرضیمه بیر لطف ائله ای شاه دورانیم منیم
حشره تک منده اولوم تا همجوارین یا حسین
قلبده گوردون غلامین عشق مالامالینی
دلده آه آتشین ئوزده سرشک آلینی
بهریه سنده یتوردون نخله آمالینی
آبیاری تا ائده دین نخلزارین یا حسین
گئتدی میدان نبرده الده تیغ جانستان
سالدی اول حمله ده تپراقه نئچه پهلوان
عاقبت اطرافینی آلدی سپاه شامیان
اشقیای دون عناداً توکدی ثارین یا حسین
ایسته دی وئرسین اوزاقدان شاه دینه بیر سلام
باشینی گوردی آلوب ناگه دیزی اوسته امام
گوزلرون آچدی دئدی ای شهریار ذوالکرام
گل قصورین عفو ائله بو شرمسارین یا حسین
تیغ هجران رشته وصلی یاخین اولدی اوزه
شه غلامیله باخوب بیر نئچه لحظه گوز گوزه
نوکریله قویدی شاه عالم آخر ئوز ئوزه
بو تواضعله گوروب کیم شهریارین یا حسین
ای شه عالم نویدی سیزلره وابسته دور
گر چه بی کاشانه لیقدان سیدی دلخسته دور
درگهونده خدمتی اما بو منظور اوسته دور
بیرده بو حضاریله ئوپسون مزارین یا حسین
ورود آل الله به شام