بولسیدیم اگر بئله سوسوزسان حتما" سو یئرینه قان وئرردیم
آیا نیه دگمدون گوزومدن مشکیمدن اصابت ائتدون ای اوخ
آیا نیه دگمدون اورکدن تا خانه دل مجلل اولسون
تا مکتب عشق و معرفتده عباسیده شخص اول اولسون
دوندردی بهاریمی خزانه بو اوخ آتانین الی شل اولسون
آلدون عجب اختیار الیمدن آرامیمی غارت ائتدون ای اوخ
من نهر فراتیدن بو مشکی دولدو رموشودوم بو نیتیله
سیراب ائدم آل مصطفانی توفیق تاپام بو خدمتیله
حاشا داخی من گئدم خیامه اصغر یانینا بو خجلتیله
بیردسته سوسوزسولوب سارالمیش اطاله خیانت ائتدون ای اوخ
بیر مشک سویون منیم یانیمدا آرتیخدی بو گون بهاسی جاندان
سست اولدی بدن داخی امیدیم یأس اولدی سو مشکیم اوخلاناندان
ایمدی داخی اولماقا رضایم دویدوم بو حیاتیدن جهاندان
گئتدی یئره مایهء حیاتیم تولید خسارت ائتدون ای اوخ
یوز مین یارا دگسه دلخوشام گر اوخدان پر آچام بسان شهباز
گر سینسا عمودیلن بو باشیم اولام شهدا ایچینده ممتاز
دعوا گونی جنگ جبهه سینده قرباندی شهه وفال ی سرباز
افسوس قصور خدمت اولدی ایجاد ندامت ائتدون ای اوخ
هر دعوی عشق ائدن جهاندا اثبات وفاده محکم اولماز
جسمیمده هامی یارام ساغالسا اما بو یارایه مرهم اولماز
مین یاره دگه آقام حسینه بیر ذره ارادتیم آز الماز
ظاهرده بو مشکه دگدون اما قلبیمی جراحت ائتدون ای اوخ
تا سو واریدی قاچاردی دشمن قور خاردی قوشون صلابتیمدن
سو گئتدی امید یأسه دوندی اوزدون الیمی شجاعتیمدن
ایمدی داخی راضیم وجودیم دوغرانسین ئولوم خجالتیمدن
قورتولدون او دم که سن کماندان اعلان شهادت ائتدون ای اوخ
بیر مشک سو اوسته من بو چولده گئچمیشدیم ایکی اوزون قولومدان
یاغدیردیلا اوستومه هوادن اوخ لشکر کینه صاق صولومدان
اخیامه او حالیله گئدردیم ائتدون منی منصرف یولومدان
کسدون منه راه آرزونی آمالیمی غارت ائتدون ای اوخ
عطشاندی رقیه خیمه لرده ایمدی چکوری سو انتظاری
بیر عده الینده بوش سو جامی گوزلر منی دلده آه و زاری
ایمدی نه ئوزیله من خجالت بیرده قیدوم خیامه ساری
بولدوردن عداوتون جهانه اظهار شقوت ائتدون ای اوخ
دریای فراتیدن بو جولده بیر مشک سووا قناعت ائتدیم
قلبیمده دئدیم زهی سعادت اطفال حسینی راحت ائتدیم
اصغرله رقیه باره سینده افکاری راحت ائتدون ای اوخ
قلبیمده ریشۀ وفانی مین تیشۀ ظلم دگسه قازماز
قرباندی حسینه باش وجانیم عباس ره وفادن آزماز
هئچ بیر قلم اوخ کیمی اورکده معانی وفای عشقی یازماز
دلده بوشودی یئرون ندن بس مشکیمده اقامت ائتدون ای اوخ
گورسه من زاری خیمه لرده بو حالیله آل عصمت آغلار
ایوای عمو وای دیوب رقیه بر پا ائلیوب قیامت آغلار
بو محنته روز و شب کریمی جاری ائدر اشک حسرت آغلار
بیر عمر اونون یارالی قلیبین آماج مصیبت ائتدون ای اوخ
ورود آل الله به شام