گنج علم و معرفت خلق ایلیوب داور سنی
بخشش و جودون سنین ایلوب خجل اهریمنی
ای کرامت بحری ای جود و سخاوت معدنی
سنسن عالمده اولان دریای احسان مجتبی
خلقتون ویرمیش فنا دنیایه بیر تازه حیات
گل جمالیندن صفا تاپدی تماما" کائنات
سن وجاهتده قویوبسان عالمی مبهوت و مات
حسن خالق چون اولوب سنده نمایان مجتبی
دیده دنیا گورنمز مثلون ای والا گوهر
سنکیمی حسن و ملاحتده یارانمیش بیر بشر
قاره زلفون خط و خالون رنگ آلون گورسه گر
یوسفیندن ال چکر یعقوب کنعان مجتبی
گلشن طاهاده تاپدون پرورش ای خوش سیر
قلب زهرایه وجودون اولدی بیر شیرین ثمر
قامت رعنا و شمشادون چمنده گورسه گر
دال ائدر قدین یقین سرو خرامان مجتبی
سن علی المرتضانین قلبینین یاراسی سن
هر پسندیده صفاتین دهریده داراسی سن
سن حقیقتسن حقیقت لفظینین معناسی سن
نقشه ناحقه چکدون خط بطلان مجتبی
ئولمیوب ئولمز حقیقت تا جهان وار زنده دی
تاج عزت شبهه شسیز شاها سنه زیبنده دی
جدیوین آئینی سنله دهریده پاینده دی
درد دینه گل وجودون اولدی درمان مجتبی
دینیده گوردون آچوبدور دست بدعت اشقیا
مکر دشمن بوخیالیله کی اولسون برملا
صلحیله سن طرح قیلدون انقلاب کربلا
تا جهان وار حفظ اولا اسلام و قرآن مجتبی
باشه گلمز محنتین شاها سنین تقریریله
تنگ ایدوب دشمن سنه دنیانی چوخ تزویریله
سن قبول صلح قیلدون بیر گوزل تدبیریله
تا اولا رسوای عالم آل سفیان مجتبی
قدریوی افسوس بیلموب دشمن بی ننگ و عار
ایلیوب قلب شریفون درد و آلامه دچار
سن غریب اولدون وطنده ای ولی کردگار
دوندی اصحابونده اولدی همچو عدوان مجتبی
بیر ائله ظلم ایتدی حقونده سنین ئوز محرمین
آرتیروبدور قلب زارونده مصیباتین غمین
هیچ ستمگر سالماز عالمده او حاله همدمین
یاندی قلبین شغلون اولدی داد و افغان مجتبی
زینب مظلومه گلمیشدی او گون مهمان سنه
تا سسون گلدی اویاندی گلدی داد و شیونه
گوردی پوزقون حالتون سسلندی قارداش وای منه
بو نه قاندور لبلرینده مثل مرجان مجتبی
نیمه ماه خدا یوم ولادتدور سنه
لطف و احسان ایله ماق ازلدن عادتدور سنه
بو نویدینین خیال و سعی خدمتدور سنه
دولدوروب پرونده سین هر چند عصیان مجتبی
حقیر علی نویدی التماس دعا88/6/13
ورود آل الله به شام