گوردی قارداشی دوشوب ایستی قوم اوستونده یاتوب
ترک ائدوب ماملکین محضر دلداره چاتوب
باشاباش پیکری ظلمیله قیزل قانه باتوب
قان حریریندن آچوب تپراقا بستر یارالی
داغیلوب میکده عشقیده ساغر سینیقی
گوز نقدر ایشلیری وار دوره ده خنجر سینیقی
بند اولوب قلبنه بیر زهرلی اوچ پر سینیقی
گورجاق اول حالی اولوب دلده اومضطر یارالی
گوردی بیر سرو کیمی قول بوداغیندان اوزولوب
یارالی پیکرینون قانی قوم اوسته سوزولوب
نعشینین اوستونه اطرافینه داشلار دوزولوب
توکدی رخسارینه اشکین دئدی پی در یارالی
بولمورم گوردی حسینون نجه کیفیتیله
یارالی قارداشینا باخدی بیر آز دقتیله
صورا بیر آه چکوب آغلادی چوخ شدتیله
اشکیله عارضنه قیلدی مصور یارالی
فلک آلمیشدی الیندن هامی خویش و ائلینی
گوردی غم تیری یاخیندی دله زینب دلنی
ایستدی قویسون اورک باشینه قارداش الینی
نه گوروب ظلمیله اولموش ایکی اللر یارالی
توکدی رخسارینه بو غمده خانم گوز یاشینی
شیشه صبرینه چالدی غم و محنت داشینی
باشلادی اوخشاسین اللرده اولن قارداشینی
اولدی سر مطلع و سر لوحه دفتر یارالی
دئدی زینب اولا قربان یارالی پیکریوه
ظلمیله ذبح اولونوب قانی آخان حنجریوه
نولی بیر سس وئره سن زینب غم پروریوه
منی دیندیر سنی زهرای مطهر یارالی
یارالی جسمیوه باخدیقجا اورکدن یانیرام
بدنون یئرده قالوبدی یانیرام اودلانیرام
یوخدی فرصت سنی دفن ایلماقا یوللانیرام
تا ائدم کوفه ویرانی مسخر یارالی
قاسمین قارداش آپاردیم من او مضطر آناسین
بیرده مجنون کیمی لیلا علی اکبر آناسین
قوللاری باغلی یانیمجا علی اصغر آناسین
سینه وین اوسته سنون قوی قالا اصغر یارالی
قیزلارون تک تکی بلبل کیمی افغانه گلوب
شعله شمعه دیرسن یانا پروانه گلوب
سنه تودیعه رقیه ندی یانا یانه گلوب
گور نه اوخشور سنی بو قلبی مکدر یارالی
بیر قیزون گوزدن اوزاق دوشدی گچن شبده حسین
عترتون قالدی هامی حال تعجبده حسین
قالمادی ذره تحمل دل زینبده حسین
او محن سالدی دل زاریمه اخگر یارالی
خیمه دن هولیله چخدیم تاپام اول مضطری من
مصرعونده او قیزی گوردوم ایا شاه زمن
رام اولوب سینه وین اوستونده او آهوی ختن
گل کیمی یاره لرون هی اوپر ائیلر یارالی
او گجه صبحه کیمی نوحه دیوب آغلامیشوق
هره بیر یاندا ئوزه اشک بصر باغلامیشوق
صود امر اصغر آناسیله سینه داغلامیشوق
دللره صبح آچیلینجا اولوب ازبر یارالی
وئر خبر بیرده علمداره باجون شامه گئدور
غصه دن گوندوزی گوزده دولانوب شامه گئدور
شرح ایله سنده ندور شامده برنامه گئدور
نگران قالماسون اول زاده حیدر یارالی
آند اولا ناحق آخان قانیوه ای کان شرف
وار باجوندا بولوسن غیرت سلطان نجف
یخماقا کاخ ستمکاری باجون ائتدی هدف
سنده ایسته اولا حامی حق داور یارالی
قویمارام یئرده قالا قانیوی احیا ائدرم
گر یئتم کوفه و شامه ائله غوغا ائدرم
زاده هنده و مرجانه نی رسوا ائدرم
قویمارام خوار اولا اولاد پیمبر یارالی
سنه خادمدی نویدی بولوسن ای شه دین
نولی ارباب اولا اوز خادمنه یار و معین
گجه گوندوز بو امیدیله سنی سسلور حسین
دوتاسان بلکه الیندن دم محشر یارالی
کرموندن کی آزالماز اونا احسان ائده سن
آنامین خاطرینه دردینه درمان ائده سن
رافتیله اونی بیر قبریوه مهمان ائده سن
وئره لر سس سسه زواریله یکسر یارالی
شهریور سال 1392 علی نویدی
ورود آل الله به شام